Respondaro pri OpenOffice.org

OpenOffice.org estas la projekto por verki plur-platforman, liberan programaron nomita OpenOffice.org. Ĝi konsistas el verkilo, tabelkalkulilo, kaj prezentilo, kiuj havas programbazon similan al tiu de StarOffice de Sun Microsystems. OOo, kiel ĝi estas konata, estas alternativo al kostaj programaroj, ekzemple Microsoft Office. OOo povas funkcii per Vindozo, Linukso, Makintoŝo OS X, LiberaBSD kaj Solaris.

2. Kion sistemo bezonas por funkciigi la programaron OpenOffice.org?

Ĝenerale ĝi bezonas 64 ĝis 128 MB da ĉefmemoro, minimume 32 MB por Vindozo aŭ Linukso. Oni konsideras ke 64 KB estas minimuma ĉar pli da ĉefmemoro plirapidigas starton kaj funkciadon. Ĉe Vindozo kaj Linukso, inter 115 kaj 240 MB da diskospaco estas bezonata, dum ĉe Makintoŝo 450 MB estas bezonata.

3. Kiel OpenOffice.org diferencas de StarOffice?

OpenOffice.org estas projekto kun libera programaro. Tio signifas ke oni provizas ĝin laŭ tre grandanimaj licencoj (LGPL kaj SISSL - pli poste).

Oni rajtas libere kunmeti la programaron OpenOffice.org kaj distribui ĝin kiel la propran, kaj vendi ĝin por gajni monon. Tia distribuaĵo estas StarOffice, de Sun Microsystems.

Tial, OpenOffice.org kaj StarOffice havas la samajn kernajn aplikaĵojn, escepte ke al OpenOffice.org mankas iuj signaroj (ekzemple aziaj signaroj kaj kelkaj por pli bona akordado kun dosieroj de Microsoft), datumbazo (AdabasD), kelkaj dosierofiltriloj, ŝablonoj kaj kolekto de bildetoj, kaj iaj ordigadofunkcioj. Tamen, la plejmulto de la mankoj estas anstataŭigeblaj per aplikaĵoj de triaj partioj.

OpenOffice.org havas preskaŭ plenkapablan galerion (ek de versio 1.1Beta2), kaj Impress ankaŭ ekinkluzivis du ŝablonojn ek de tiu versio. La oficiala dokumentaro enhavas utilan liston.

4. Kiu estas la nuna versio de OpenOffice.org?

La nuna eldono estas 1.1.4. Tiu estas havebla por platformoj Linukso, Solaris kaj Vindozo. Por Makintoŝo OS X la plej lasta eldono estas 1.1.2

OOo ne funkcias per Makintoŝo OS 9 (Classic).

Meze de 2005 version 2.0 estu havebla.

5. Kiel akiri OpenOffice.org en Esperanto aŭ alia lingvo krom la angla?

La esperanta eldono estas ankoraŭ nehavebla. Teamo da volontuloj tradukas kaj pretigas ĝin kaj ili intencas fini ĝin en la frua parto de 2005.

Nia paĝo pri kiel elŝuti havas ligon al la paĝo pri eldonoj. Ĝi listigas la lingvojn en kiu OOo estas jam havebla. Novaj asimilaĵoj (tradukaĵoj) konstante aperas. Por plua (anglalingva) informo vidu asimilaĵojn.

6. Laŭ kiu licenco estas OpenOffice.org havebla?

OpenOffice.org estas liberigita de Sun Microsystems, kiu donis la fontoprogramojn de StarOffice laŭ la Lesser General Public License de GNU (LPGL) [minora ĝenerala publika licenco] kaj ankaŭ laŭ la Sun Industry Standards Source License (SISSL) [licenco de fonto por industriskalaj normoj].

Tio signifas ke OOo estas uzebla libere, eĉ por komerca uzado. Redistribui ĝin ankaŭ estas permesita laŭ la licencado. Plua informo pri la licencoj estas en la demandaro pri licencoj ĉe la retejo de OOo.

7. Kia estas la formato de OpenOffice.org?

Ĉiuj aplikaĵoj de OOo utiligas formatojn bazitajn sur XML (etendebla markolingvo). Ĉiuj aplikaĵoj (krom Math) uzas la saman formaton laŭ la difino. La komponanto Math uzas la saman formaton, sed uzas MathML interne de la pakaĵo. La enhavo de dokumento estas pakita laŭ formato ZIP. Se vi malfermas dokumenton de OOo per zipilo vi vidos dosierojn por la teksto, por bildoj ktp kaj por listigi la enhavon (content.xml).

8. Kiaj normoj ekzistas por la formato de OpenOffice.org?

La formato de OOo estas aprobita de OASIS. En septembro 2004 Sun Microsystems proponis doni la difinon al ISO por ties konsidero. OASIS kaj ISO favoris tiun proponon, kaj submetis ĝin al la kutimaj procedoj.

Je 1a majo 2005 la specifaĵo Open Document Format for Office Applications (OpenDocument) v1.0 [Libera dokumenta formato por oficejaj aplikoj (OpenDocument), versio 1,0] estas aprobita kiel normo de OASIS. La specifaĵo OpenDocument v1.0 estas havebla en formato PDF ĉe http://www.oasis-open.org/committees/download.php/12572/OpenDocument-v1.0-os.pdf kaj en la formato de OpenOffice.org ĉe http://www.oasis-open.org/committees/download.php/12573/OpenDocument-v1.0-os.sxw.

9. Mi spertas problemojn presi dokumentojn en formato PDF. Kion fari?

Bonvolu legi la bonegan gvidilon de Christof Pintaske

10. Ĉu oni povas en OpenOffice.org utiligi dosierojn el MS Access?

Jes. Estas facile, precipe se vi sekvas la metodon de John McCreesh. Vidu lian gvidilon.

11. Ĉu haveblas libroj por helpi uzulojn pri la uzado de OpenOffice.org?

Jes, la retejo Taming OpenOffice.org havas ligojn al kelkaj verkoj en la angla lingvo, ekzemple:

GetOpenOffice.org estas bonega libro por komencantoj - The OpenOffice.org 1.0 Resource Kit.

OpenOffice.org Clue Sheets - Gvidiloj po du paĝoj por ĉiu aplikaĵo; tre utilaj. Recenzo ekzistas.

OpenOffice.org Writer: The Free Alternative to Microsoft Word, Jean Hollis Weber, 2004 O'Reilly Community Press, ISBN 0596008260

OOoSwitch: 501 Things You Wanted to Know about Switching to OpenOffice.org - de Tamar E. Granor, Hentzenwerke, 2003, ISBN 1930919360, relative nova informilo pri kiel ŝanĝi al OpenOffice.org.

12. Kiel nomi ĝin ĝuste?

Iom pedante, oni devus nomi ĝin "OpenOffice.org", kaj ne simple "OpenOffice". OO kaj OOo estas oftaj mallongigoj, precipe en retmesaĝoj.

13. Kiel mi povas helpi al OpenOffice.org?

Aliĝu kiel membro de OpenOffice.org, aŭ de la Esperantiga Skipo, kaj tiam faru unu aŭ pli el la jenaj:

Legu la retejon de OOo ĉe "OpenOffice.org Needs YOU!"

Se vi trovas problemon, serĉu ekzistantan raporton de simila problemo (Bug report) en IssueZilla; se ĝi estas raportita, voĉdonu por ĝi, aliakaze raportu vian problemon.

Se vi opinias ke OpenOffice.org bezonas specifan plibonigon, serĉu en IssueZilla por ekzistanta simila peto "Request for Enhancement". Se iu jam proponis ĝin, voĉdonu por ĝi; aliakaze proponu ĝin.

Helpu trakti raporton pri problemo, provante refari la cimon, kaj aldonu komenton al la raporto pri ĉu vi povis reprodukti la cimon.

Aliĝu al unu el la grupoj de evoluigantoj aŭ testantoj.

Helpu traduki la programon OpenOffice.org al Esperanto aŭ al alia lingvo.

Verku makroon por fari ian taskon per OpenOffice.org, kaj donu ĝin al la projekto.

14. Kie estas aliaj informaĵoj?

Eble helpus al vi la respondaro anglalingva.