Plui di cualchidun si podarès domandâ a ce che al covenbte insegnâ e doprâ in informatiche une lenghe locâl.
L'insegnament dal furlan a scuele al è un dirit di ducj i fruts e di ducj i students che a vivin in Friûl: magari cussì no, dome par motîfs politics, tantis voltis la scuele e à fintremai convinçût i gjenitôrs che no vevin di fevelâ par furlan ai fîs nancje a cjase. Chest procès al à fat un grant dam al furlan, ma ancje al talian, stant che i gjenitôrs che no savevin ben il talian si sfuarçavin di fevelâlu in ogni câs ai fîs. Cussì a pensavin di judâju e invezit, cence visâsi, ur insegnavin un grum di erôrs che dopo al è tant dificil netâ vie.
La storie che il furlan al impedìs di imparâ ben in talian al è une sflocje e dutis lis esperiencis e lis ricercjis di educazion in plui lenghis a disin che dôs lenghis studiadis ben si judin une cun chê altre e no si fasin cuintri. Imparâ il furlan al è no dome un dirit e un dovê di rispiet pe storie e pe identitât dal Friûl, ma al è ancje une maniere di jentrâ miôr in Europe e un imprest che al permet di imparâ miôr e plui svelts chês altris lenghis. Al è provât che cui che al sa dôs lenghis al à tante facilitât a cjapâ sù une tierce e che invezit cui che al sa dome une pal solit al fâs avonde fadie par imparâ la seconde. Cuntun imprest informatic come chest o sperìn di furnî ancje un imprest didatic ae scuele par che al sedi simpri plui naturâl podê doprâ il furlan tes nestris scuelis.
E po no stin a dismenteâsi che pal solit la plui part dai prodots informatics a nassin in lenghe inglese e duncje a la domande "Ace covential un software par furlan?" si podarès rispuindi in maniere polemiche "E alore a ce covential un software par talian?".
La lenghe furlane e pues jessi ancje une risorse economiche: in Gales, in Catalogne (tra i prins a disvilupâ versions di software in lenghe locâl) e di tantis altris bandis la lenghe locâl e je deventade un element impuartant dal mont economic, un motôr di produzion creative che sul prin moment al domande un piçul investiment e che dopo si trasforme in ricjece par dute la societât, fasint cressi une vore il nivel e lis pussibilitâts di ocupazion di setôrs tant che il turisim, la publicitât, la produzion leterarie e soredut musicâl e televisive. Intun mont che par tancj aspiets al è daûr a deventâ dut compagn, vê alc di diferent al pues deventâ une ricjece ancje economiche.
O sperìn duncje che di chestis esperiencis al puedi nassi e cressi un circul virtuôs e che il mont de economie e des gnovis tecnologjiis al cjapi interès e al ponti ancje sul nestri patrimoni linguistic par promovisi e par promovi i siei prodots doprant la lenghe furlane come marcje di cualitât e di particolaritât.